सोलापूर (सिद्धांत बाबरे) : समाजातील सर्व स्तरातील घटकांची आर्थिक उन्नती व्हावी हे सहकार तत्वाला अपेक्षित आहे. उत्तम अर्थउन्नतीसाठी संस्कारयुक्त सहकाराची आवश्यकता आहे, असे प्रतिपादन सहकार भारतीचे अखिल भारतीय संघटन मंत्री संजय पाचपोर यांनी केले. डॉ. हेडगेवार नागरी सहकारी पतसंस्थेचे उद्घाटन शनिवारी संजय पाचपोर यांच्या हस्ते शिवस्मारक सभागृहात झाले.
याप्रसंगी व्यासपीठावर पतसंस्थेचे अध्यक्ष उमाकांत चाफेकर, उपाध्यक्ष प्रभाकर बाबरे, सचिव सतीश कुदळे, संचालिका अश्विनी चव्हाण, वंदना करजगीकर, रत्नमाला पाटील, संचालक ॲड. संतोष न्हावकर, डॉ. उदय वैद्य, डॉ. महेश पवार, राहुल माळी, गणेश वास्ते उपस्थित होते.
यावेळी राष्ट्रीय स्वयंसेवक संघाचे विभाग कार्यवाह मुकुंदराव कुलकर्णी, जिल्हा कार्यवाह सी.ए. ऋषिकेश कुलकर्णी, सहकार भारतीचे विभाग संघटक संतोष गायकवाड यांची प्रमुख उपस्थिती होती.
श्री. पाचपोर म्हणाले, ज्या सहकारी संस्थांमध्ये संस्कारांचा अभाव होता त्या संस्था मोडकळीस निघाल्या. त्यामुळे सहकारी क्षेत्रातील संस्थांमध्ये संचालक आणि सभासद देखील प्रशिक्षित व संस्कारित असण्याची अत्यंत आवश्यकता आहे. सहकारी चळवळीच्या माध्यमातून महिला आत्मनिर्भर झाल्या तर कुटुंब सांभाळण्यासाठी त्या आणखी सक्षम होतील. अमूल कंपनी ही सहकारी तत्त्वावर चालणाऱ्या संस्थांसमोर आदर्श उदाहरण म्हणून पाहता येईल, असेही श्री. पाचपोर याप्रसंगी म्हणाले. पतसंस्थेचे संचालक उदय वैद्य यांनी प्रास्ताविक केले. संचालिका वंदना करजगीकर यांनी सूत्रसंचालन तर अध्यक्ष उमाकांत चाफेकर यांनी आभार प्रदर्शन केले. या कार्यक्रमास सहकार चळवळीतील अनेक मान्यवरांची उपस्थिती होती.
%20(27).jpeg){kind=small}
No comments:
Post a Comment